วนฺทิตฺวา เต มหาราช, นิสีทาปิย อาสเน;

กตฺวา วิวิธสกฺการํ, ปุจฺฉิ อาคตการณํฯ

[107]

ปิยงฺคุทีเป สงฺเฆน, เปสิตํ มนุชาธิป;

ตมสฺสา สยิตุํ อมฺเห, อิติ ราชา ปุนา’หเตฯ

[108]

‘‘กถํ นุ ภนฺเต อสฺสาโส, มม เหสฺสติ เยน เม;

อกฺโขภิณิมหาเสน, ฆาโต การาปิโต’’อิติฯ

[109]

‘‘สคฺคมคฺคนฺตราโย จ, นตฺถิ เต เตน กมฺมุนา;

ทียฑฺฒมนุชา เจ’ตฺถ, ฆาติตา มนุชาธิปฯ

[110]

สรเณสุ ฐิโต เอโก, ปญฺจสีเลปิ จา’ปโร;

มิจฺฉาทิฏฺฐิ จ ทุสฺสีโล, เสสา ปสุสมามตาฯ

[111]

โชตยิสฺสสิ เจว ตฺวํ, พหุธา พุทฺธสาสนํ;

มโนวิเลขํ ตสฺมา ตฺวํ, วิโนทย นริสฺสรฯ

[112]

อิติ วุตฺโต มหาราชา, เตหิ อสฺสาสมาคโต;

วนฺทิตฺวา เต วิสชฺเชตฺวา, สยิโต ปุน จินฺตยิฯ

[113]

วินา สงฺเฆน อาหารํ, มาภุญฺเชถ กทาจิปิ’’;

อิติ มาตาปิตา’หาเร, สปิํสุ ทหเร’ วโนฯ

[114]

อทตฺวา ภิกฺขุสงฺฆสฺส, ภุตฺตํ อตฺถิ นุโข อิติ;

อทฺทส ปาตราสมฺหิ, เอกํ มริจวฏฺฏิกํฯ

[115]

สงฺฆสฺส อฏฺฐเปตฺวาว ปริภุตฺตํ สติํ วินา;

ตทตฺถํ ทณฺฑกมฺมํ เม, กตฺตพฺพนฺติ จ จินฺตยิฯ

[116]

เอเต เตเนกโกฏิ อิธ มนุชคเณ ฆาติเต จินฺตยิตฺวา,

กามานํ เหตุ เอตํ มนสิ จ กยิรา สาธุ อาทีนวํ ตํ;

สพฺเพสํ ฆาตนิํ ตํ มนสิ จ กยิรา’ นิจฺจตํ สาธุ สาธุ,

เอวํ ทุกฺขา ปโมกฺขํ สุภคติ มหวา ปาปุเณยฺยา’จีเรนาติฯ

สุชนปฺปสาทสํเวคตฺถาย กเต มหาวํเส

ทุฏฺฐคามณิวิชโย นาม

ปญฺจวีสติโม ปริจฺเฉโทฯ

ฉพฺพีสติม ปริจฺเฉท

มริจวฏฺฏิกวิหารมโห

[1]

เอกจฺฉตฺตํ กริตฺวาน, ลํการชฺชํ มหายโส;

นานนฺตรํ สํวิทหิ, โยธานํ โส ยถารหํฯ

[2]

เถรปุตฺตาภโย โยโธ, ทิยฺยมานํ น อิจฺฉิตํ;

ปุจฺฉิโตว กิมตฺถนฺติ, ยุทฺธมตฺถีติ อพฺรวิฯ

[3]

เอกรชฺเช กเต ยุทฺธํ, กินามตฺตีติ ปุจฺฉิโต;

ยุทฺธํ กิเลส โจเรหิ, กริสฺสามิ สุทุชฺชยํฯ

[4]

อิจฺเจว มาห ตํ ราชา, ปุนปฺปุนํ นิเสธยิ;

ปุนปฺปุนํ โสยาจิตฺวา, รญฺโญนุญฺญาย ปพฺพชิฯ

[5]

ปพฺพชิตฺวา จ กาเลน, อรหตฺตมปาปุณิ;

ปญฺจขีณาสวสต-ปริวาเอรา อโหสิ จฯ

[6]

ฉตฺตมงฺคล สตฺตาเห, คเต คตภโย’ ภโย;

ราชา กตา ภิเสโกว, มหตา วิภเวน โสฯ

[7]

ติสฺสวาปิ’มคา กีฬ-วิธินา สมลงฺก ตํ;

กีฬิตุํ อภิสิตฺตานํ, จาริตฺตญฺจา นุรกฺขิตุํฯ

[8]

รญฺโญ ปริจฺฉทํ สพฺพํ, อุปายนสตานิ จ;

มริจวฏฺฏิวิหารสฺส, ฐานมฺหิ ฐปยิํสุ จฯ

[9]

ตตฺเถว ถูปฐานมฺหิ, สธาตุํ กุนฺตมุตฺตมํ;

ฐเปสุํ กุนฺตธรกา, อุชุกํ ราชมานุสาฯ

[10]

สโหโรโธ มหาราชา, กีฬิตฺวา สลิเล ทิวา;

สายมาหํ คมิสฺสาม, กุนฺตํ วฑฺเฒถ โภ’’อิติฯ

[11]

จาเลตุํ ตํ น สกฺขิํสุ, กุนฺตํ ราชาธิการิกา;

คนฺธามาลาหิ ปูเชสุํ, ราชเสนาสมาคตาฯ

[12]